Ġaħan fl-Aqwa Żmien

Tiftakruh lil Ġaħan? Dak it-tifel Malti li ġibed il-bieb tad-dar t’ommu? Dażgur li tiftakruh. Ġaħan huwa l-aktar karattru letterarju popolari Malti. Kontu tafu li Ġaħan ta’ Malta ġej minn Ġaħan Għarbi li jismu Ġoħa? Fuq hekk ngħidilkom darb’oħra. Għalissa għandi bżonn nirrakkontalkom l-istorja tal-Ġaħan Malti għax għadda ħafna żmien minn mindu ġibed il-bieb, u minn dak iż-żmien ’l hawn Ġaħan inbidel! Ġaħan illum jismu Dustin. Jaħdem fl-IT bħala developer. Baqa’ kummidjant imma sar xi ftit aktar intellliġenti. Ma jistax jgħabbi mara. Dejjem bil-problemi. Jixtieq isir artist imma għażżien. Moħħu biex jiekol. Daħal fil-crypto biex jagħmel lira u tilef kollox. Xtara penthouse l-Fgura fl-Aqwa Żmien u ġietu ħażin. Darba ltaqa’ ma’ politikanta li jisimha Polly u talbitu jagħmlilha website. Dustin ħaseb li tħobbu u l-website għamilhielha imma daħħlitu f’biċċa inkwiet. Imma fl-aħħar irnexxielu jpattihielha. Dan huwa rumanz satiriku fuq Malta ħanina, ħobża u sikkina. Dan huwa rumanz fuq Malta u l-Maltin. Dustin huwa x-xempju tar-raġel Malti fl-Aqwa Żmien. Jien, l-awtur, jisimni Mark Camilleri u dan huwa l-ewwel rumanz tiegħi. Is-soltu nikteb kotba tal-istorja. Tħawdunix ma’ kopji oħra tiegħi li għamel il-Gvern biex igerfixkom. Sirt famuż mindu kien hemm politikanta korrotta u għamlitli libell. Tgħid tagħmilli libell ieħor? Dar Camilleri www.markcamilleri.org

Year

2022

Language

mlt

Publisher

Dar Camilleri

Editions

1

ISBN

9789918953523

Data source: Wikidata